50 укытучыга - 50шәр мең сум!

Уфада башкорт һәм урыс телләренең иң яхшы укытучыларына республика Хөкүмәтенең акчалата бүләген тапшыру тантанасы үтте.
Республиканың 50 иң яхшы башкорт һәм урыс телләре укытучылары Хөкүмәтнең акчалата бүләгенә лаек булды. Бүләкләү тантанасы бүген Уфада Мәгарифне үстерү институтында узды.

Агымдагы елда республика комиссиясе тарафыннан 125 педагогның конкурс материаллары карап тикшерелде, аларның 77се — башкорт теле, 48е — урыс теле укытучылары. Башкорт һәм урыс телләренең иң яхшы 50 укытучысына 50шәр мең сум күләмендә акчалата премия бирелде.

"Бу атна вакыйгаларга бай булды. 5 октябрьдә без Укытучылар көнен билгеләдек, 11 октябрьдә Республика көнен билгеләп үтәбез. Бәйрәм алдыннан без республикабызның иң яхшы дәүләт телләре укытучыларын котлыйбыз. Башкортстан Хөкүмәте һәм республика комиссиясе исеменнән сезне башкорт һәм урыс телләренең иң яхшы укытучылары конкурсында җиңүегез белән котлыйбыз, бәяләп бетергесез хезмәтегез өчен зур рәхмәт белдерәбез һәм яңа иҗади казанышлар телибез”, — диде Хөкүмәт вице-премьеры Фәнүр Ягафәров.

Укытучыларны БР мәгариф һәм фән министры Айбулат Хаҗин да сәламләде.

“Иң яхшы укытучылар, үз эшенең осталары бәйгесе тәмамланды. Сез мәгариф системасында үз миссиягезне лаеклы алып барасыз. Сез балаларны сөйләргә, уйларга, матур итеп үз фикерләрен белдерергә өйрәтәсез. Җәмгыятьтә үз-үзеңне күзаллый белү һәр заман кешесенең иң мөһим компетенциясе булып тора. Тел белгечләреннән башка бу хәл була алмый. Сез классиканы, әдәбиятны, җәмгыятьне яратырга өйрәтәсез, укучыларның әхлак нигезләрен формалаштырасыз", — диде министр.

Башкортстан Республикасы Хөкүмәтенең “Башкорт һәм урыс телләренең иң яхшы укытучыларын акчалата бүләкләү турында”гы карары “Башкортстан Республикасы халыклары телләре турында”, “Башкортстан Республикасында мәгариф турында”гы законнарына ярашлы рәвештә, дәүләт телләрен укыту сыйфатын яхшырту, башкорт һәм урыс телләренең иң яхшы укытучыларын матди кызыксындыру максатында кабул ителде.

Чыганак: https://omet-rb.rbsmi.ru/articles/m-garif-m-grif-t/Ille-ukituchiga-illesh-r-me-sum-488140/