Барлык яңалыклар

Шайтан таягы (Чертополох)

.

Бу үсемлек үзендәге файдалы матдәләрнең аеруча күп булуы белән аерылып тора. Аның составындагы силимарин дигән матдә бавыр эшчәнлеген яхшырта, токсиннарны чыгара. Сапонин дигәне ялкынсынуларны бетерә. Биофлавоноидлар табигый антиоксидант вазыйфасын башкара. Шайтан таягындагы эфир майлары исә косметологиядә киң кулланылышта йөри. Шулай ук бу үсемлектә лимон, кузгалак, алма, гликоль, малон серкәләре бар.
Дәвалану өчен шайтан таягының чәчәкләре, орлыклары, яфраклары һәм тамыры кулланыла. Әлеге үсемлекнең чәчәкләрен – июнь-июль айларында, орлыкларын – август уртасыннан октябрь башына кадәр, ә яфраклары белән тамырларын октябрьдә җыярга мөмкин.
Шайтан таягының чәчәкләрен киптереп һәм ваклап чәй итеп эчәләр. Мондый эчемлек бронхит, күрем вакытындагы авыртулардан котылу өчен кулланыла. Шулай ук мондый чәй сидек юллары белән бәйле авыруларны дәваларга да сәләтле.
Шайтан таягының орлыкларын, тартып, он рәвешенә китерәләр. Мондый он бавыр эшчәнлеген яхшырта, үт куыгыннан үт агу процессын җиңеләйтә, аяклардагы кан тамырлары белән бәйле авыруларны дәвалый.
Шайтан таягы тамырыннан ясалган төнәтмә исә эч киткәндә, көзән җыерганда, онкологик авырулар вакытында кулланыла. Ул йокысызлыктан интегүчеләр өчен дә бик файдалы.
Шайтан таягының сусыл сабакларыннан ясалган үсемлек суы яраларны төзәтү сәләтенә ия. Аны яраланган урынга сөртәләр, ә подагра, ревматизм, столбняк кебек авырулар вакытында хәтта эчәләр дә.
Чыганак: https://vk.com/beznen_avil
Фото: vse-o-kedrovyh-fitobochkah.ru